వాకింగ్ ఎలా చేస్తే మంచిది…|

​రోజువారీ నడక ఆరోగ్యానికి మేలు చేస్తుందని మనందరికీ తెలుసు. వాకింగ్ ఎవరైనా సరే సులభంగా చేయగలిగే వ్యాయామం. రోజు పది నిమిషాలు నడిచినా.. ఎన్నో వ్యాధుల్ని దూరంగా ఉంచవచ్చు. అయితే, చాలా మందికి ఓ అనుమానం ఉంది. రోజులో ఒకేసారి నడవాలి, లేదంటే రోజులో అప్పుడప్పుడు నడిచినా సరిపోతుందా?

ఈ రోజుల్లో గుండెపోటు కేసులు ఎక్కువైపోతున్నాయి. పెద్దల నుంచి పిల్లల వరకు గుండెపోటు కేసులు నమోద్వడం మనం చూస్తూనే ఉన్నాం. అందుకే గుండెని జాగ్రత్తగా చూసుకోవాలి. గుండెకి మాత్రమే పూర్తి ఆరోగ్యంగా ఉండటానికి నడక చాలా ప్రయోజనకరంగా ఉంటుందని ఇటీవలి ఒక పరిశోధనలో తేలింది.

వాకింగ్ శరీరంలోని ప్రతి భాగానికి వ్యాయామం ఇస్తుంది. ప్రతి రోజూ నడిస్తే ఎన్నో ఆరోగ్య ప్రయోజనాలు ఉంటాయి. డయాబెటిస్, అధిక బరువు, కొలెస్ట్రాల్ సమస్యలతో బాధపడేవారికి నడక ప్రయోజనకరంగా ఉంటుంది. ఒక వ్యక్తి వారానికి 6 గంటలు నడిచినట్లయితే, వారు జిమ్‌కు వెళ్లాల్సిన అవసరం లేదు లేదా మరే ఇతర వ్యాయామం చేయాల్సిన అవసరం లేదని పరిశోధన నివేదిక చెబుతోంది.

నడక ఆరోగ్యంపై ఉత్తమ ప్రభావాన్ని చూపుతుందని ఆ నివేదిక పేర్కొంది. అయితే, ఇక్కడే అసలైన డౌట్ చాలా మందికి ఉంది. గుండె బలంతో పాటు మొత్తం ఆరోగ్యం కోసం రోజులో ఒకేసారి నడవాలా, లేదంటే ఎప్పుడు నడిచినా సరిపోతుందా? దీనిపై అమెరికన్ కాలేజి ఆఫ్ కార్డియాలజీ క్లారిటీ ఇచ్చింది

ఇంటర్నల్ మెడిసిన్ అన్నల్స్‌లో ప్రచురితమైన ప్రాస్పెక్టివ్ కోహోర్ట్ అధ్యయనం.. 34,000 మంది నడక అలవాట్లను విశ్లేషించింది. రోజంతా అప్పుడప్పుడు నడిచే వారి కంటే.. ఒకేసారి 15 నిమిషాలు లేదా అంతకంటే ఎక్కువసేపు నడిచే వారికి గుండె జబ్బులు, ఇతర కారణాల వల్ల మరణించే ప్రమాదం గణనీయంగా తక్కువగా ఉందని కనుగొన్నారు. అయితే, ఒకేసారి నడిచినా.. అప్పుడప్పుడూ నడిచినా దాదాపు ఒకే రకమైన ప్రయోజనాలు ఉన్నాయి. అయితే, ఒకేసారి ఎక్కువ సేపు నడవడం వల్ల అదనపు ప్రయోజనాలు ఉన్నాయి

​ఒకేసారి ఎక్కువసేపు నడవడం వల్ల హృదయ స్పందన రేటు క్రమంగా ఉంటుంది. దీంతో, రక్త ప్రసరణ మెరుగుపడుతుంది . ఎక్కువసేపు నడవడం వల్ల గుండె జబ్బుల ప్రమాదం దాదాపు 70% తగ్గుతుందని పరిశోధనలో తేలింది.
వ్యాయామం సరైన సమయానికి చేసినప్పుడు మాత్రమే శరీరం దాని పూర్తి ప్రయోజనాలను పొందుతుంది. లాంగ్ వాకింగ్ జీవక్రియ, ఇన్సులిన్ సెన్సిటివిటీని మెరుగుపరుస్తుంది. అంతేకాకుండా మానసిక ఆరోగ్యంపై సానుకూల ప్రభావాలను చూపుతాయని తేలింది.
రోజుకు 5,000 అడుగుల కంటే తక్కువ నడిచే వారికి లాంగ్ వాకింగ్ మంచి చేస్తుందని అధ్యయనం చెబుతోంది. ఒకేసారి గంటసేపు నడవడం వల్ల మెరుగైన ఆరోగ్య ప్రయోజనాలు ఉన్నాయి.

ఒకేసారి ఎక్కువసేపు నడవడం వల్ల ఎక్కువ ప్రయోజనాలు ఉన్నప్పటికీ, అప్పుడప్పూడూ నడవడం పనికిరానిదని దీని అర్థం కాదు. రోజంతా అప్పుడప్పుడూ నడవడం ఆరోగ్యానికి మేలు జరుగుతుంది. ముఖ్యంగా ఎక్కువసేపు కూర్చుని జాబ్ చేసుకునేవారు అప్పుడప్పుడూ కాసేపు అయినా నడవాలి. గంటకు ఒకసారి అయినా కాసేపు నడిస్తే కీళ్ల నొప్పులు తగ్గుతాయి. అంతేకాకుండా శక్తి స్థాయిలు పెరుగుతాయి. భోజనం చేసిన తర్వాత ఓ పది నిమిషాలు నడిస్తే జీర్ణక్రియ మెరుగుపడుతుంది.

బరువు తగ్గాలనుకునేవారికి లాంగ్ వాకింగ్ బెస్ట్ ఆప్షన్. క్రమం తప్పకుండా గంటసేపు నడిస్తే, వారి బరువు చాలా త్వరగా తగ్గుతుంది. హార్వర్డ్ మెడికల్ స్కూల్ పరిశోధన ప్రకారం 10 నిమిషాలు వేగంగా నడవడం అంటే జిమ్‌లో గంటకు పైగా చెమట పట్టడంతో సమానం.

గమనిక

ఇది సాధారణ సమాచారం కోసం మాత్రమే. ఇది ఏ విధంగానూ ఏ మెడిసిన్ లేదా చికిత్సకు ప్రత్యామ్నాయం కాదు. వీటిని పాటించేముందు మరింత సమాచారం కోసం ఎల్లప్పుడూ మీ వైద్యుడిని సంప్రదించండి.