ఎన్టీఆర్‌ లుక్‌పై అభిమానుల్లో టెన్షన్…|

యంగ్ టైగర్ ఎన్టీఆర్ లేటెస్ట్ లుక్ చూసిన అభిమానులు ఒక్కసారిగా షాక్ అయ్యారు. ఎప్పుడూ బలంగా, ఎనర్జిటిక్‌గా కనిపించే తారక్ తాజాగా బక్కగా మారిపోవడంతో అభిమానుల్లో ఆందోళన మొదలైంది. ‘ఆర్ఆర్ఆర్’, ‘దేవర’ కోసం బరువు పెరిగిన తారక్, ‘వార్ 2’ కోసం కాస్త స్లిమ్ అయ్యాడు. కానీ ఇప్పుడు మరీ సన్నగా, పీలగా కనిపిస్తుండటం ఫ్యాన్స్‌ని కలవరపాటుకు గురిచేస్తోంది. ఆ లుక్ నీల్ సినిమా కోసమా.. లేక నిజంగానే అలా మారిపోయాడా అని ఫ్యాన్స్ టెన్షన్ పడుతున్నారు,

ఆర్ఆర్ఆర్, దేవర చిత్రాలతో బ్లాక్ టు బ్యాక్ హిట్లు కొట్టిన యంగ్ టైగర్ ఎన్టీఆర్ ప్రస్తుతం ప్రశాంత్ నీల్ డైరెక్షన్లో ఓ సినిమా చేస్తున్న సంగతి తెలిసిందే. మరోవైపు ఆయన డెబ్యూ హిందీ చిత్రం ‘వార్ 2’ ఆగస్టు 14న రిలీజ్ కానుంది. ఇందులో హృతిక్ రోషన్‌తో కలిసి నటిస్తున్నాడు ఎన్టీఆర్. ఎన్టీఆర్ పుట్టినరోజు సందర్భంగా రిలీజ్ చేసిన టీజర్‌కి భారీ రెస్పాన్స్ వచ్చింది. ఓ వైపు ప్రశాంత్ నీల్‌తో మూవీ చేస్తూనే త్రివిక్రమ్‌తో మరో ప్రాజెక్టుకు గ్రీన్‌సిగ్నల్ ఇచ్చేశాడు. ఇది హిందూ దేవుడైన కుమారస్వామి ఆధారంగా తెరకెక్కనున్నట్లు ఇండస్ట్రీ టాక్.

అయితే తాజాగా ఎన్టీఆర్‌ లుక్‌పై ఫ్యాన్స్ టెన్షన్ పడుతున్నారు. కోట శ్రీనివాసరావుకి నివాళులర్పించడానికి ఆదివారం ఆయన ఇంటికి వెళ్లిన ఎన్టీఆర్ ఆ తర్వాత మీడియాతో మాట్లాడారు. కోట లాంటి మహానటుడితో కలిసి నటించడం తన అదృష్టమని… ఆయన లాంటి నటుడు మళ్లీ పుట్టరని అన్నారు. చివర్లో అభిమానులు జై ఎన్టీఆర్ అని నినాదాలు చేస్తే ఎన్టీఆర్ వాళ్లని వారించి జై కోట అని నినాదం చేశారు. అయితే అంతా బాగానే ఉన్నా ఇప్పుడు ఎన్టీఆర్ లుక్‌పైనే అందరి దృష్టి పడింది. ఆయన్ని చూస్తుంటే అనారోగ్యంగా బాధపడుతున్నట్లుగా, మొహంలో కళ లేకుండా పేషెంట్‌లా కనిపిస్తున్నారు. బాగా బక్కచిక్కిపోయి నీరసంగా కనిపిస్తున్నారు. ఇదే ఇప్పుడు ఎన్టీఆర్ ఫ్యాన్స్‌ని ఆందోళనకు గురిచేస్తోంది.

అసలు ఎన్టీఆర్‌కి ఏమైంది.. ఎందుకిలా అయిపోయాడని అభిమానులు ఆరా తీస్తున్నారు. ఈ మధ్యకాలంతో ఎన్టీఆర్‌ అనారోగ్యానికి గురైనట్లు ఎక్కడా వార్తలు రాలేదు. అలాంటిది ఆయన ఇంత బక్కగా కనిపించడానికి కారణాలేమిటో అర్థంకాక టెన్షన్ పడుతున్నారు. ఆర్ఆర్ఆర్, దేవర చిత్రాల కోసం బరువు పెరిగిన ఆయన.. ‘వార్ 2’ కోసం కాస్త బరువు తగ్గాడు. అయినా కూడా టీజర్‌లో బాగానే కనిపించాడు. మరిప్పుడు ఈ లుక్ ప్రశాంత్ నీల్ సినిమా కోసమా.. లేక నిజంగానే తారక్ అలా మారిపోయాడా? అని టెన్షన్ పడుతన్నారు. ప్రశాంత్ నీల్ సినిమాల్లో హీరోలు బాగా దిట్టంగా, స్టైలిష్‌గా కనిపిస్తుంటారు. కానీ ఈ మూవీలో ఆయన ఎన్టీఆర్‌ని ఎలా చూపించబోతున్నారో అని అభిమానులు ఆత్రుతగా ఉన్నారు. ఇలాంటి సమయంలో ఎన్టీఆర్ ఇలా కనిపించడంతో అయోమయానికి గురవుతున్నారు. దీనిపై ఎన్టీఆర్ టీమ్ క్లారిటీ ఇస్తే బాగుంటుందని రిక్వెస్ట్ చేస్తున్నారు.